టీమ్ ఇండియా ఆల్ రౌండర్.. నయా హిట్టర్ హార్దిక్ పాండ్యాను సిక్సర్లు కొట్టనీయకుండా కట్టడి చేస్తానని న్యూజిలాండ్ స్పిన్నర్ మిచెల్ శాంట్నర్ ధీమా వ్యక్తం చేశాడు. ఆదివారం వాంఖడే వేదికగా తొలి వన్డే ఆరంభంకానున్న నేపథ్యంలో మీడియాతో ఈ కివీస్ స్పిన్నర్ మాట్లాడాడు. ఇటీవల ఆస్ట్రేలియాతో ముగిసిన వన్డే సిరీస్లో స్పిన్నర్ ఆడమ్ జంపా బౌలింగ్లో హార్దిక్ పాండ్య హ్యాట్రిక్ సిక్సర్లు బాదేసిన విషయం తెలిసిందే. నాలుగు నెలల వ్యవధిలోనే నాలుగు సార్లు ఈ యువ ఆల్రౌండర్ హ్యాట్రిక్ సిక్సర్లు బాది సరికొత్త రికార్డు నెలకొల్పాడు. ఇందులో రెండు సార్లు పాకిస్థాన్ స్పిన్నర్లపై ఛాంపియన్స్ ట్రోఫీలో ఈ ఘనత అందుకోగా.. ఒకసారి శ్రీలంక స్పిన్నర్పై ప్రతాపం చూపాడు.
‘హార్దిక్ పాండ్య చాలా నైపుణ్యమున్న హిట్టర్. అతనికి బౌలింగ్ చేసేటప్పుడు ఏ మాత్రం బౌలర్ గతి తప్పినా శిక్ష తప్పదు. కాబట్టి.. నా అంచనా ప్రకారం బౌలర్ క్రమశిక్షణతో లైన్ అండ్ లెంగ్త్కి కట్టుబడి బౌలింగ్ చేస్తే హిట్టింగ్ నుంచి తప్పించుకోవచ్చు. లయతో బౌలింగ్ చేసే వారి బౌలింగ్లో హార్దిక్ ఎక్కువగా సింగిల్స్కే పరిమితమవుతుంటాడు. ఇటీవల ఆడమ్ జంపా బౌలింగ్లో హ్యాట్రిక్ సిక్సర్లని అతను బాదడం చూశా. ఒకసారి అతను హిట్టింగ్ మొదలెడితే.. ఇక ఔటయ్యే వరకూ అదే జోరుని కొనసాగిస్తాడు. అందుకే.. అతడ్ని సింగిల్కే పరిమితం చేసేలా బౌలింగ్తో కట్టడి చేస్తా. కానీ.. నిమిషాల వ్యవధిలోనే తన హిట్టింగ్తో మ్యాచ్ స్వరూపాన్ని మార్చేయగల శక్తి ఉన్న హార్దిక్తో కొంచెం జాగ్రత్తగానే ఉంటాం’ అని శాంట్నర్ వివరించాడు.