Home / TELANGANA / ప్రారంభోత్స‌వానికి కాళేశ్వ‌రం సిద్ధం…ఆ రోజు ఏం చేయ‌నున్నారంటే..

ప్రారంభోత్స‌వానికి కాళేశ్వ‌రం సిద్ధం…ఆ రోజు ఏం చేయ‌నున్నారంటే..

దేశం చూపును త‌న‌వైపు తిప్పుకుంటున్న కాళేశ్వరం ప్రాజెక్టు  ఈ నెల 21న ప్రారంభం కానున్న సంగ‌తి తెలిసిందే. ప్రభుత్వం ప్రారంభాన్ని కన్నుల పండువగా నిర్వహించనుంది . ఇందుకోసం భారీగా  ఏర్పాట్లు జరుగుతున్నాయి. ప్రాజెక్టు దగ్గర శాస్త్రోక్త క్రతువులు, ఊరూరా సంబురాలు చేయాలని సీఎం కేసీఆర్ నిర్ణయించినట్టు తెలుస్తుంది. ప్రారంభోత్సవానికి ముగ్గురు ముఖ్యమంత్రులు, ఇద్దరు గవర్నర్లు హాజరుకానున్నారు. ప్రారంభ ఉత్సవాల సందర్భంగా నిర్వహించే సభకు పెద్దఎత్తున జనసమీకరణ చేయనున్నారు.

ప్రాజెక్టు ప్రారంభోత్సవ సమయంలో మేడిగడ్డ బ్యారేజీ దగ్గర మొదటి పూజ, హోమం చేయనున్నారు. తర్వాత కన్నెపల్లి పంపుహౌజ్  ప్రారంభోత్సవం జరగనుంది. కన్నెపల్లి పంపుహౌజ్  దగ్గర తెలంగాణ, ఏపీ, మహారాష్ట్ర సీఎంలు మూడు పంపులకు స్విచ్  ఆన్  చేయ‌నున్నారు. అక్కడ 45 నిమిషాలు పూజా కార్యక్రమం నిర్వహించనున్నారు. గోదావరి జలాలను గ్రావిటీ కాలువలో ఎత్తిపోసే స్థలం దగ్గర 30 నిమిషాలకు పైగా పూజా కార్యక్రమాలు ఉంటాయి. కన్నెపల్లి పంపుహౌజ్  దగ్గర సీఎం కేసీఆర్ వరుణున్ని ఆహ్వానించే హోమం చేస్తారని సమాచారం.

కాళేశ్వ‌రం ప్రారంభోత్సవం తర్వాత స్వామి సన్నిధానంలో గోదావరి జలాలతో ఆయన అభిషేకం నిర్వహిస్తారని తెలుస్తుంది. తర్వాత ముగ్గురు ముఖ్యమంత్రులు కాళేశ్వర ఆలయాన్ని దర్శించుకునేందుకు అధికారులు ఏర్పాట్లు చేస్తున్నారు. సీఎం కేసీఆర్ సూచనలతో శృంగేరి పీఠం పండితులు నిన్న మేడిగడ్డ బ్యారేజీ, కన్నెపల్లి పంపుహౌజ్  ప్రాంతాలను సందర్శించారు. ప్రత్యేక పూజలకు అనువైన స్థలాలను పరిశీలించారు. మేడిగడ్డ, కన్నెపల్లి దగ్గర నిర్వహించనున్న యాగాలకు జలసంకల్ప యాగాలుగా నామకరణం చేశారు.  ప్రారంభోత్సవ ఏర్పాట్లతో కన్నెపల్లి పంపుహౌజ్  వద్దకు సందర్శకులను అనుమతించడం లేదు.