గ్లోబరీనా సంస్థకు గుడ్ బై..!!

మొన్న వెలువడిన తెలంగాణ ఇంటర్ ఫలితాల్లో గందరగోళానికి కారణమైన గ్లోబరీనా సంస్థకు ఇంటర్ బోర్డ్ ఎట్టకేలకు గుడ్ బై చెప్పింది. త్వరలో జరగనున్న అడ్వాన్స్‌డ్‌ సప్లిమెంటరీ ఫలితాల ప్రాసెస్ కోసం మరో కొత్త సంస్థను ఎంపిక చేసేందుకు చర్యలు చేపట్టింది. అయితే ఈ నెల 25 నుంచి అడ్వాన్స్‌డ్‌ సప్లిమెంటరీ పరీక్షలు ప్రారంభం కానున్న సంగతి తెలిసిందే. దాదాపు ఈ పరీక్షకు 3.5 లక్షల మంది విద్యార్థుల ఫలితాలను ప్రాసెస్‌ చేయాల్సి ఉంది. కాగా.. 2018 – 19 నుంచి మూడేళ్ల పాటు పరీక్ష ఫలితాల నిర్వహణ బాధ్యతను ఇంటర్ బోర్డ్ గ్లోబరీనా సంస్థకు అప్పగించగా మొదటి సంవత్సరంలోనే ఈ సంస్థ విఫలమైంది. ఈ క్రమంలో ఈ వ్యవహారాన్ని రాష్ట్ర ప్రభుత్వం సీరియస్ గా తీసుకుని సంస్థ పై వేటు వేసింది.