Home / ANDHRAPRADESH / చంద్రబాబుకు కోలుకోలేని దెబ్బ… గంటాతో సహా 9 మంది ఎమ్మెల్యేలు జంప్..!

చంద్రబాబుకు కోలుకోలేని దెబ్బ… గంటాతో సహా 9 మంది ఎమ్మెల్యేలు జంప్..!

2019 సార్వత్రిక ఎన్నికల్లో టీడీపీ ఘోర పరాజయం పాలైంది. పార్టీ చరిత్రలో ఎన్నడూ లేనంతంగా కేవలం 23 మంది సీట్లకే పరిమితం అయింది. అయితే ఈ 23 మంది ఎమ్మెల్యేలలో ఇప్పటికే గన్నవరం టీడీపీ ఎమ్మెల్యే వల్లభనేని వంశీ పార్టీకి రాజీనామా చేశాడు. వంశీ సీపీలో చేరబోతున్నట్లు వార్తలు వచ్చినా…ఎందుకనో ఇంకా ముహూర్తం ఖరారు కాలేదు. ఇక ఉన్న 22 మందిలో మరో 9 మంది టీడీపీ ఎమ్మెల్యేలు గోడ దూకడానికి సిద్దంగా ఉన్నారన్న వార్తలు టీడీపీలో కలకలం రేపుతున్నాయి. విశాఖ నార్త ఎమ్మెల్యే గంటా ఎప్పటి నుంచో పార్టీ మారబోతున్నట్లు వార్తలు వినిపిస్తున్నాయి. అధికారం ఎక్కడ ఉంటే ఆ పార్టీలో చేరి మంత్రి పదవి కొట్టేయడం గంటా స్టైల్.. ఈ విషయంలో గతంలో రెండుసార్లు గంటాకు వర్కవుట్ అయింది. అయితే ఈ సారి జగన్ ముందు గంటా పప్పులు ఉడకలేదు. దీంతో వైసీపీలో చేరే ప్రయత్నాలు మానుకుని బీజేపీలోకి వెళ్లేందుకు గంటా ప్రయత్నాలు మొదలెట్టాడు. ఈ మేరకు బీజేపీ పెద్దలతో టచ్‌లో ఉన్న గంటా..ప్రస్తుతం ఢిల్లీకి వెళ్లి ఆ పార్టీలో చేరికకు రంగం సిద్ధం చేసుకుంటున్నట్లు తెలుస్తోంది. గత రెండు రోజులుగా ఢిల్లీలో బీజేపీ జాతీయ కార్యదర్శి రాంమాధవ్‌తో భేటీ అవుతున్న గంటా..తన రాజకీయ భవిష్యత్తుతో పాటు, వ్యక్తిగత ప్రయోజనాల గురించి కూడా చర్చించినట్లు సమాచారం. అయితే ఈ సందర్భంగా చంద్రబాబుకు దిమ్మతిరిగే షాక్ ఇచ్చేందుకు బీజేపీ అధిష్టానం సిద్ధమైంది. గంటాతో పాటు మరో 9 మంది ఎమ్మెల్యేలను బీజేపీలోకి చేర్పించేందుకు సుజనాచౌదరి రంగంలోకి దింపింది. సుజనా రాయబారంతో గంటా కూడా తనకు తగిన ప్రాధాన్యత కల్పిస్తే ఆ 9 మంది ఎమ్మెల్యేలను తీసుకువచ్చేందుకు సిద్ధం అని చెప్పినట్లు సమాచారం. గంటాతో పాటు ప్రకాశం జిల్లాకు చెందిన ఓ ఎమ్మెల్యే, విశాఖ జిల్లాకు చెందిన ఓ ఎమ్మెల్యే, గుంటూరు జిల్లాకు చెందిన ఓ ఎమ్మెల్యే, అనంతపురంకు చెందిన మరో టీడీపీ ఎమ్మెల్యే బీజేపీలో చేరేందుకు సిద్ధంగా ఉన్నారని తెలుస్తోంది. మొత్తంగా గంటాతో సహా 9 మంది ఎమ్మెల్యేలు బీజేపీలో చేరబోతున్నట్లు వస్తున్న వార్తలు టీడీపీలో కలకలం రేపుతున్నాయి. ఇదే జరిగితే చంద్రబాబుకు ప్రతిపక్షహోదా కూడా గల్లంతు కావడం ఖాయంగా కనిపిస్తోంది.